स्थानिक गुन्हे शाखेची कामगिरी; 10 मोटरसायकलसह 5 लाख रुपयांचा मुद्देमाल जप्त...

लातूर- पोलीस स्टेशनला दाखल असलेल्या विशेषतः मोटारसायकल चोरीचे गुन्हे उघडकीस आणण्याकरिता विशेष पथके स्थापन करून गुन्हे उघड करण्याचे प्रयत्न सुरू होत. पोलीस अधीक्षक श्री. सोमय मुंडे यांचे आदेशान्वये अपर पोलीस अधीक्षक डॉ. अजय देवरे, उपविभागीय पोलिस अधिकारी लातूर शहर श्री.जितेंद्र जगदाळे यांचे मार्गदर्शनात पोलीस निरीक्षक स्थानिक गुन्हे शाखा श्री. गजानन भातलवंडे यांचे नेतृत्वात जिल्ह्यातील विविध पोलीस स्टेशनला घडलेले मालाविषयक गुन्हे उघडकीस आणण्याकरिता पोलीस अधिकारी व अंमलदार यांना सूचना व मार्गदर्शन करण्यात आले होते.

पोलीस ठाणे शिवाजी नगर येथे दाखल असलेल्या मोटारसायकल चोरीच्या गुन्ह्यातील चोरलेली मोटार सायकल घेऊन संशयित आरोपी सचिन दयानंद गायकवाड हा गरुड चौक परिसरात फिरत आहे. अशी खात्रीशीर बातमी मिळाल्याने पथक तात्काळ गरुड चौक परिसरात पोचून रोडवर हिरो होंडा स्प्लेंडरसह थांबलेल्या व्यक्तीला विश्वासात घेऊन विचारपूस केली असता त्याने त्याचे नाव सचिन दयानंद गायकवाड असे असल्याचे सांगितले. तसेच त्यांच्या ताब्यात असलेल्या वाहना संदर्भाने विचारपूस केली असता स्प्लेंडर मोटर सायकल काही दिवसापूर्वी लातूर शहरातून चोरी केलेली आहे.

तसेच लातूर शहरातील विविध ठिकाणाहून त्याच्या आणखीन साथीदार मिळून मोटारसायकली चोरी केल्याचे सांगितले. त्यावरून गुन्ह्यातील नमूद आरोपीला ताब्यात घेऊन लातूर शहरातील विविध पोलीस स्टेशनच्या हद्दीतून चोरी केलेल्या मोटारसायकल बाबत विचारपूस करुन आरोपीकडून चोरीच्या आणखीन इतर 9 विविध कंपनीच्या मोटारसायकली ज्याची एकूण किंमत 5 लाख 5 हजार रुपयाचा मुद्देमाल हस्तगत करण्यात आला. मोटार सायकल चोरीचे पोलीस ठाणे शिवाजीनगर, एमआयडीसी, गांधी चौक येथील 04 गुन्हे उघडकीस आलेले आहेत.

स्थानिक गुन्हे शाखेचे पोलीस निरीक्षक श्री. गजानन भातलवंडे यांचे मार्गदर्शनात सहाय्यक पोलीस उपनिरीक्षक शैलेश जाधव, सहायक पोलीस उपनिरीक्षक संजय भोसले, पोलीस अंमलदार सुधीर कोळसुरे, राम गवारे, मोहन सुरवसे, प्रमोद तरडे, योगेश गायकवाड, मनोज खोसे, राहुल कांबळे, चंद्रकांत केंद्रे, राजेश कंचे यांनी पार पाडली.

#mahalivenews #Latur #BreakingNews